Sheesha-e-dil

Ranjish hi sahi dil hi dukhane ke liye aa
aa phir se mujhe chhod ke jaane ke liye aa

Pahale se maraasim na sahi phir bhi kabhi tou
rasm-o-rahe duniya hi nibhane ke liye aa
Ranjish hi sahi dil hi dukhane ke liye aa
aa phir se mujhe chhod ke jaane ke liye aa

Kis kis ko batayenge judaai ka sabab ham
tu mujhse khafaa hai tou zamaane ke liye aa
Ranjish hi sahi dil hi dukhane ke liye aa
aa phir se mujhe chhod ke jaane ke liye aa

Kuch tou mere pindaar-e-mohabbat ka bharam rakh
tu bhi to kabhi mujh ko manaane ke liye aa
Ranjish hi sahi dil hi dukhane ke liye aa
aa phir se mujhe chhod ke jaane ke liye aa

Ek umr se hoon lazzat-e-giriyaa se bhi maharuum
aye raahat-e-jaan mujh ko rulaane ke liye aa
Ranjish hi sahi dil hi dukhane ke liye aa,
aa phir se mujhe chhod ke jaane ke liye aa.

Ab tak dil-e-khushfeham ko tujh se hain ummiden
ye aakharii shammen bhi bujhaane ke liye aa
Ranjish hi sahi dil hi dukhane ke liye aa
aa phir se mujhe chhod ke jaane ke liye aa

- Ahmad Faraz

Dard-e-dil

Gulon mein rang bhare baad-e-naubahaar chale
Chale bhi aao ke gulshan ka kaarobaar chale

Qafas udaas hai yaaron saba se kuchh to kaho
Kahin to bahr-e-Khuda aaj zikar-e-yaar chale
Chale bhi aao ke gulshan ka kaarobaar chale
Gulon mein rang bhare baad-e-naubahaar chale

Kabhi to subah tere kunj-e-lab se ho aaghaz
Kabhi to shab sar-e-kaakul se mushakbaar chale
Chale bhi aao ke gulshan ka kaarobaar chale
Gulon mein rang bhare baad-e-naubahaar chale

Bara hai dard ka rishta yeh dil gharib sahi
Tumhare naam pe aaenge ghamgusaar chale
Chale bhi aao ke gulshan ka kaarobaar chale
Gulon mein rang bhare baad-e-naubahaar chale

Jo hum pe guzri so guzri magar shab-e-hijra
Hamaare ashq tere aaqbat sanwaar chale
Chale bhi aao ke gulshan ka kaarobaar chale
Gulon mein rang bhare baad-e-naubahaar chale

Maqaam Faiz koi raah mein jacha hi nahin
Jo kue yaar se nikle to sue daar chale
Chale bhi aao ke gulshan ka kaarobaar chale
Gulon mein rang bhare baad-e-naubahaar chale

Shabdkosh